ဆာနား၊ ဩဂုတ်-၄-၂၀၂၅
မျိုးဆက်(VOM)
ယီမင်ကမ်းလွန်မှာ လူ ၁၅၇ ယောက်လိုက်ပါလာတဲ့ စက်လှေနစ်မြုပ်မှုကြောင့် လူ ၆၈ ယောက်ထက်မနည်း သေဆုံးပြီး ၁၂ ယောက်ကို ကယ်တင်နိုင်ခဲ့တယ်လို့ တာဝန်ရှိသူတွေက ပြောပါတယ်။
ဒီစက်လှေဟာ အာဘီယန်ပြည်နယ် အနီးမှာ တနင်္ဂနွေနေ့က တိမ်းမှောက်ခဲ့တာဖြစ်ပြီး ဒါဇင်ချီပျောက်ဆုံးနေဆဲဖြစ်ပါတယ်။ သေဆုံးသူအများစုဟာ အီသီယိုးပီးယားနိုင်ငံသားတွေဖြစ် တယ်လို့ နိုင်ငံတကာ ရွှေ့ပြောင်းနေထိုင်သူများအဖွဲ့ ကဆိုပါတယ်။
ယီမင်ဟာ အာဖရိကဦးချိုဒေသက ပင်လယ်ကွေ့နိုင်ငံတွေကိုအလုပ်လုပ်ဖို့သွားတဲ့ ရွှေ့ပြောင်းအလုပ်သမားတွေအတွက် အဓိကဖြတ်သန်းရာလမ်းကြောင်းဖြစ်ပြီး မကြာသေးမီကာလတွေအတွက် စက်လှေ သင်္ဘောတွေနဲ့ ဖြတ်ကူးရင်း ရာနဲ့ချီတဲ့ လူသေဆုံး ပျောက်ဆုံးမှုတွေရှိခဲ့တယ်လို့ ခန့်မှန်းထားပါတယ်။
အာဘီယန်ပြည်နယ် အာဏာပိုင်တွေကတော့ ကြီးမားတဲ့ကယ်ဆယ်ရေးလုပ်ငန်းစတင်ခဲ့ပြီး ကမ်းခြေတွေမှာ အလောင်းတွေအများကြီးတွေ့ရှိခဲ့တယ်လို့ ဆိုပါတယ်။ လူကုန်ကူးသူတွေရဲ့ခေါင်းပုံဖြတ်မှုကနေ ကာကွယ်ဖို့ ရွှေ့ပြောင်းအလုပ်သမားတွေအတွက် ဥပဒေအရကာကွယ်မှုတွေမြှင့်တင်ဖို့ အရေးကြီးကြောင်းလည်း နိုင်ငံတကာ ရွေ့ပြောင်းနေထိုင်သူများအဖွဲ့ ယီမင်ဌာနမှူးက ပြောပါတယ်။
“ကျွန်တော်တို့အားလုံးအဖွဲ့ဝင်နိုင်ငံတွေအတွက် တိုက်တွန်းနေတာက လူတွေဥပဒေနဲ့အညီရွှေ့ပြောင်းနိုင်ဖို့ ပုံမှန်လမ်းကြောင်းတွေတိုးမြှင့်ပေးဖို့ဖြစ်ပြီး လူကုန်ကူးသူတွေရဲ့ထောင်ချောက်တွေကိုရှောင်ရှားနိုင်စေဖို့နဲ့ အန္တရာယ်များတဲ့ခရီးစဉ်တွေကနေရှောင်ရှားနိုင်စေဖို့ဖြစ်တယ်” လို့ သူကပြောပါတယ်။
ဆိုမာလီယာ၊ ဂျီဘူတီ၊ အီသီယိုးပီးယားနဲ့ အီရီတရီးယားတို့ပါဝင်တဲ့ အာဖရိကဦးချိုဒေသကနေ ယီမင်ကိုသွားတဲ့ခရီးစဉ်ဟာ သွားလာမှုအများဆုံးနဲ့ အန္တရာယ်အများဆုံး ရွှေ့ပြောင်းနေထိုင်မှုလမ်းကြောင်း ပြောပါတယ်။
မတ်လမှာ ယီမင် ဒဟူဘက် ခရိုင်ကမ်းခြေအနီးမှာ ရွှေ့ပြောင်းဒုက္ခသည် ၁၈၀ ကျော်ပါ စက်လှေနှစ်စီး လှိုင်းကြီးမှုကြောင့်နစ်မြုပ်ခဲ့ပြီး အမှုထမ်းနှစ်ယောက်မှလွဲပြီး အားလုံး သေဆုံးခဲ့ပါတယ်။
Ref:BBC
Photo:X
